ಬೆಂಗಳೂರು: ಸುಂಕದಕಟ್ಟೆ ಆ್ಯಸಿಡ್ ದಾಳಿ ಪ್ರಕರಣದ ಸಂತ್ರಸ್ಥೆಗೆ ವಿಕ್ಟೋರಿಯಾ ಆಸ್ಪತ್ರೆಯಿಂದ ಚರ್ಮದಾನ ಮಾಡಲಿದೆ ಎಂದು ತಿಳಿದುಬಂದಿದೆ.
ಬೆಂಗಳೂರಿನ ಸೇಂಟ್ ಜಾನ್ಸ್ ಆಸ್ಪತ್ರೆಯ ಪ್ಲಾಸ್ಟಿಕ್ ಸರ್ಜನ್‌ಗಳು ವಿಕ್ಟೋರಿಯಾ ಆಸ್ಪತ್ರೆಯ ಸ್ಕಿನ್ ಬ್ಯಾಂಕ್‌ನಿಂದ 24 ವರ್ಷದ ಆಸಿಡ್ ದಾಳಿಗೆ ಒಳಗಾದ 24 ವರ್ಷದ ಯುವತಿಗೆ ಚರ್ಮ ಕಸಿ ಮಾಡಲು ಚರ್ಮವನ್ನು ಹುಡುಕುತ್ತಿದ್ದಾರೆ. ಇದು ಕರ್ನಾಟಕದಲ್ಲಿ ಇಂತಹ ಮೊದಲ ಬ್ಯಾಂಕ್ ಮತ್ತು ದೇಶದ ಎರಡನೇ ದೊಡ್ಡ ಚರ್ಮ ಬ್ಯಾಂಕ್ ಆಗಿದೆ.
ಚರ್ಮದಾನದ ಬಗ್ಗೆ ಹೆಚ್ಚು ತಿಳಿದಿಲ್ಲವಾದರೂ, ಆರು ವರ್ಷಗಳ ಹಿಂದೆ ಈ ಚರ್ಮ ಬ್ಯಾಂಕ್ ಪ್ರಾರಂಭವಾದಾಗಿನಿಂದ ಈ ವರೆಗೂ 139 ಮೃತರ ಕುಟುಂಬಗಳು ತಮ್ಮ ಸಂಬಂಧಿಕರ ಚರ್ಮವನ್ನು ಸ್ಕಿನ್ ಬ್ಯಾಂಕ್‌ಗೆ ದಾನ ಮಾಡಿದ್ದಾರೆ. ಆದರೂ, ವಿಕ್ಟೋರಿಯಾ ಆಸ್ಪತ್ರೆಯಲ್ಲಿನ ತೃತೀಯ ಆರೈಕೆಯ ಸುಟ್ಟಗಾಯಗಳ ಘಟಕವು ದಿನಕ್ಕೆ ಸರಾಸರಿ ಐದರಿಂದ ಆರು ರೋಗಿಗಳನ್ನು ಎರಡನೇ ಮತ್ತು ಮೂರನೇ ಹಂತದ ಸುಟ್ಟಗಾಯಗಳೊಂದಿಗೆ ಆಸ್ಪತ್ರೆ ದಾಖಲಾತಿ ಪಡೆಯುತ್ತಿದೆ. ಹೀಗಾಗಿ ಬೇಡಿಕೆ ಮತ್ತು ದಾನದ ನಡುವಿನ ಅಂತರವು ದೊಡ್ಡದಾಗಿದೆ. ಏಕೆಂದರೆ ತಮ್ಮ ಆಸ್ಪತ್ರೆಯಲ್ಲಿನ ರೋಗಿಗಳಿಗೆ ತಮ್ಮ ಬ್ಯಾಂಕಿನಿಂದ ಚರ್ಮವನ್ನು ಬಳಸಲಾಗುತ್ತಿದೆಯಾದರೂ ಅಲ್ಲಿಯೂ ಬೇಡಿಕೆಗೆ ಅನುಗುಣವಾಗಿ ಚರ್ಮ ಶೇಖರಣೆಯಾಗುತ್ತಿಲ್ಲ. ಇದರ ನಡುವೆಯೇ ಇತರ ಆಸ್ಪತ್ರೆಗಳಿಂದಲೂ ಚರ್ಮಕ್ಕಾಗಿ ಮನವಿಗಳು ಬರುತ್ತಿವೆ ಎನ್ನಲಾಗಿದೆ.

ಭಾರತವು ವಾರ್ಷಿಕವಾಗಿ 80 ಲಕ್ಷಕ್ಕೂ ಹೆಚ್ಚು ಸುಟ್ಟಗಾಯಗಳ ಪ್ರಕರಣಗಳನ್ನು ದಾಖಲಿಸುತ್ತಿದೆ, ಪ್ರತಿ ವರ್ಷ ಸುಮಾರು 1.4 ಲಕ್ಷ ಸಾವುಗಳು ಮತ್ತು 4 ಲಕ್ಷ ಜನರು ಅಂಗವೈಕಲ್ಯದಿಂದ ಬಳಲುತ್ತಿದ್ದಾರೆ. ಈ ಪೈಕಿ ಶೇ.70 ಪ್ರತಿಶತದಷ್ಟು ಪ್ರಕರಣಗಳು ಅಡುಗೆಮನೆ ಅಥವಾ ಕೆಲಸದ ಸ್ಥಳಕ್ಕೆ ಸಂಬಂಧಿಸಿದ ಅಗ್ನಿ ಅಪಘಾತಗಳ ಪರಿಣಾಮವಾಗಿದೆ. ಜೊತೆಗೆ ಆತ್ಮಹತ್ಯೆ ಮತ್ತು ಹತ್ಯಾಪ್ರಯತ್ನಗಳ ಪ್ರಮಾಣವೂ ಇದರಲ್ಲಿ ಸೇರಿವೆ. ಆದರೂ, ದೇಶದಲ್ಲಿ ಕೇವಲ 16 ಮತ್ತು ಕರ್ನಾಟಕದಲ್ಲಿ ಎರಡು ಸ್ಕಿನ್ ಬ್ಯಾಂಕ್‌ಗಳಷ್ಟೇ ಇವೆ. ಅವುಗಳಲ್ಲಿ ಒಂದು ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ಮತ್ತು ಇನ್ನೊಂದು ಬೆಳಗಾವಿಯ ಕೆಎಲ್‌ಇಎಸ್‌ನಲ್ಲಿವೆ ಎಂದು ಪ್ಲಾಸ್ಟಿಕ್ ಸರ್ಜರಿ ವಿಭಾಗದ ಘಟಕದ ಮುಖ್ಯಸ್ಥ ಪ್ರೊಫೆಸರ್ ಡಾ ಸ್ಮಿತಾ ಎಸ್ ಸೇಗು ಹೇಳಿದ್ದಾರೆ.

ಸ್ಕಿನ್ ಬ್ಯಾಂಕ್ ಅರ್ಹ ಮೃತ ದಾನಿಗಳಿಂದ ಚರ್ಮವನ್ನು ಸಂಗ್ರಹಿಸುತ್ತದೆ. ಅಂತಾರಾಷ್ಟ್ರೀಯ ಪ್ರೋಟೋಕಾಲ್ ಪ್ರಕಾರ ಈ ಬ್ಯಾಂಕ್ ಪ್ರಕ್ರಿಯೆಗೊಳಿಸುತ್ತದೆ. ಶೇಖರಿಸಿದ ಚರ್ಮವನ್ನು ಸಂರಕ್ಷಿಸುತ್ತದೆ ಮತ್ತು ವಿತರಿಸುತ್ತದೆ ಎಂದು ಡಾ ಸ್ಮಿತಾ ವಿವರಿಸಿದರು. ನೈಸರ್ಗಿಕ ಕಾರಣಗಳಿಂದ ಸಾಯುವ 18 ವರ್ಷ ವಯಸ್ಸಿನ ಆರೋಗ್ಯವಂತ ಮೃತ ದಾನಿಗಳಿಂದ ಚರ್ಮವನ್ನು ಹಿಂಪಡೆಯಬಹುದು. ಇದನ್ನು ದಾನಿಗಳಿಂದ ಮರಣದ ನಂತರ ಆರು ಗಂಟೆಗಳ ಒಳಗೆ, ಆಸ್ಪತ್ರೆಯಲ್ಲಿ ಅಥವಾ ಮನೆಯಲ್ಲಿ ಅಥವಾ ಶವಾಗಾರದಲ್ಲಿ ಪರಿಣಿತ ತಂಡ ಸಂಗ್ರಹಿಸುತ್ತದೆ. ಇದನ್ನು ಲ್ಯಾಬ್/ಸ್ಕಿನ್ ಬ್ಯಾಂಕ್‌ಗೆ ವರ್ಗಾಯಿಸಲಾಗುತ್ತದೆ. ಅಲ್ಲಿ ಅದನ್ನು ಸಂಸ್ಕರಿಸಲಾಗುತ್ತದೆ ಮತ್ತು ಫ್ರೀಜರ್‌ಗಳಲ್ಲಿ ಸಂಗ್ರಹಿಸಲಾಗುತ್ತದೆ. ಸೆರಾಲಜಿಯನ್ನು ಪರೀಕ್ಷಿಸಲು ದಾನಿಗಳ ರಕ್ತದ ಮಾದರಿಯನ್ನು ಸಂಗ್ರಹಿಸಲಾಗುತ್ತದೆ ಮತ್ತು ಬ್ಯಾಕ್ಟೀರಿಯಾದ ಬೆಳವಣಿಗೆಯಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ಚರ್ಮವನ್ನು ಪರೀಕ್ಷಿಸಿ ಬೆಳೆಸಲಾಗುತ್ತದೆ ಎಂದು ಅವರು ಹೇಳಿದರು.

ದಾನಿಗಳ ಚರ್ಮವನ್ನು ಭಾಗಶಃ ದಪ್ಪ, ಎರಡನೇ ಮತ್ತು ಮೂರನೇ ಹಂತದ ಆಳವಾದ ಸುಟ್ಟಗಾಯಗಳು, ಅಪಘಾತಗಳಿಂದಾಗಿ ಉಂಟಾದ ಗಾಯಗಳು, ಮಧುಮೇಹ ಮತ್ತು ಸೋಂಕಿನಿಂದ ಉಂಟಾಗುವ ದೊಡ್ಡ ಗಾಯಗಳು, ಹುಣ್ಣುಗಳು ಮತ್ತು ಇತರೆ ಸಮಸ್ಯೆಗಳಲ್ಲಿ ಅಲೋಗ್ರಾಫ್ಟ್ ಆಗಿ ಬಳಸಲಾಗುತ್ತದೆ. ಇದು ಸುಟ್ಟ ಪ್ರದೇಶ, ನೋವು ಮತ್ತು ಸೋಂಕಿನ ಪ್ರಮಾಣದಿಂದ ದ್ರವದ ನಷ್ಟವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಮತ್ತು ರೋಗಿಗಳು ಆಸ್ಪತ್ರೆಯಲ್ಲಿ ಉಳಿಯುವ ಅವಧಿಯನ್ನು ಕಡಿಮೆ ಮಾಡುತ್ತದೆ ಮತ್ತು ಮರಣ ಸಾಧ್ಯತೆಯನ್ನು ಕಡಿಮೆ ಮಾಡುತ್ತದೆ. ಚರ್ಮವು ಲಭ್ಯವಿಲ್ಲದಿದ್ದರೆ, ತಜ್ಞರು ಚರ್ಮದ ಬದಲಿಗಳಂತಹ ದುಬಾರಿ ವಿಧಾನಗಳನ್ನು ಪ್ರಯತ್ನಿಸುತ್ತಾರೆ ಎಂದು ಡಾ ಸ್ಮಿತಾ ಹೇಳಿದರು.